Kamor`a ho elelloa tšotleho eo sepolesa se neng se tobane le eona, sepolesa sa Lesotho se ikelelitse ho itlhahisetsa seaparo sa sona.
Tlaleho ea sepolesa e supa ha e le khoeli ea bobeli sepolesa se koetliselitsoeng ho roka sa Ntlo-Kholo ea Sepolesa se qalile ho hlahisa seaparo, ‘me ho fihlela ha joale se se se rokile tse ka bang 90.
Ea tšoereng molepo e le Phala ea Sepolesa, Senior Superintendent Kabelo Halahala o hlalositse tjena litlalehong tsa sepolesa ka Labobeli, Maseru.
“Sena Mookameli oa sepolesa o se entse kamor`a ho hlokomela hore litho tsa sepolesa li ne li qeta nako e ngata ka seaparo se seng maemong a matle,” a toboketsa joana.
A re ka tlhahiso ena ha hona hoba le lebaka la hore sepolesa se hloke seaparo, kaha joale se se se itlhahisetsa sona.
“Ke tebello ea Mookameli oa sepolesa hore litho tsena tse ikarabellang tlhahisong ea seaparo li tla sebetsa kathata, molemong oa tlhahiso ea boleng,” a rialo a phethela.
Setsi sena seo sepolesa se itlhahisetsang seaparo ho sona, ke mapolesa a 10 a rokang seaparo sa sepolesa, `me sona se okametsoe ke Lepolesa Chere Nkoso.
Ho sa le joalo, ka Mphalane ha sepolesa se ne se amohela makoloi a neng a tliló tlatsetsa tšebetsong ea sepolesa ea letsatsi le letsatsi, Mookameli oa Sepolesa Holomo Molibeli o ne a phatlalatse hore sepolesa se mothating oa ho itlhahisetsa seaparo, ‘me kajeno seo sea phethahala.
Ke hona litlalehong tsena moo Senior Superintendent Halahala a hlalositseng hore khoeli ea Tlhakubele e tšoaetsoe hoba le sehlooho se reng ‘Moshoeshoe le Lesotho’ kaha ho ketekoa lilemo tse 200 a thehile sechaba sa Basotho.
“Athe khoeli ea Loetse eona, ke khoeli ea `mino oa litsoanya, `me sehlooho sa eona ke pina e buang ka Morena Moshoeshoe le Lesotho,” a hlalosa joalo.
A supa hore ke tsela eo sepolesa se tliló keteka lilemo tsena tse 200 tseo Morena Moshoeshoe a neng a thehe sechaba sa Basotho.