Sepolesa se khalema ka matla lipolao tse bonahalang li ata Thoteng ea Bola-nku, Ha-`Mamathe ka Labone bekeng e fetileng.
Ha a bua pitsong eo, ea tšoereng molepo e le Mookameli oa sepolesa sa Lesotho Dr Mahlape Morai, o boletse hore eena le moifo oa hae ba etetse motse oo kaha e le e meng ea metse e ipetsang pele ka lipolao, ‘me ba tlilo khalemela sechaba seo hore lipolao li fokotsehe metseng eo.
A re e le sepolesa ba batla bo tlisa polokeho le tšireletso sechabeng, kaha ba rata sechaba sa habo bona.
“Ke ipiletsa hore le tlise litloli tsa molao sepoleseng li tla bolekeha,” a rialo Mookameli oa sepolesa, a bile a eketsa ka hore moo e bang menyenyetsi ha ea tšoaroa hantle, sechaba se tlalehe sepoleseng se joalo.
Mookameli oa sepolesa a re o ipiletsa ho sechaba hore se be le lerato, se tsebe ho thusana le sepolesa ho felisa lipolaeano, kaha sechaba ke sepolesa `me se polesa ka sechaba.
Morena oa Ha-`Mamathe, Morena Seeiso Lobiane Masupha o ipilelitse hore ho be le lipuisano lipakeng tsa sepolesa le sechaba e le ho qoba ho ba le tšabo ea ho tlaleha litlokotsebe.
A re o ipiletsa ho makhotla hore litloli tsa molao li se fuoe monyetla oa ho itefella beili, li mpe li ahloloe ho hoehla setsing sa tlhabollo ea batšoaruoa e le hore ba tsoe ka hare ho sechaba.
Ho feta moo, ea tšoereng molepo e le Mookameli motebong oa Ha-`Mamathe Inspector Sebili Tjokosela o bontšitse hore sepolesa se tšoenyehile haholo ke lipolao sebakeng seo, ’me eena o tsoile kahar`a ofisi ho tla thiba boemo boo.
A tsoela pele a re o boetse o tlile sechabeng, ho tla nka maikutlo a sona hore na se ka rata ho sebetsa joang le bahlanka ba ‘muso.
Mookameli oa Sepolesa Berea Senior Superintendent ‘Mapuleng Setomi o bontšitse hore ba se ba ile ba etela Ha-Bose ho na sebakeng seo sa Ha-`Mamathe, hobane ke sebaka se seng se fetohileng khapha-mali.
A re ha batho ba lutse ba ithabisa ka mothamahane ha ho a lokela hore e be ho fihla litlokotsebe tse hlokisang batho botsitso.
A tsoela pele a re Ha-Phiri motho o ile a thunngoa motšeare kamor’a hora ea boraro, hape e mong a ituletse le ba bang, ‘me ba mo thunya.
“Ke habeli re fumana batho ba sa tsejoeng ka likoloi kahar`a motse ba tšoere lithunya, ‘me ke ipiletsa hore sechaba se hlabele sepolesa patsana ha se bona batho bao se sa ba tsebeng metseng ea bona,” a toboketsa joana.
Leha ho le joalo, e mong oa banna ba motse Monghali Teboho Mofokeng o bontšitse hore e le sechaba ba na le tšabo ea ho hlahisa beng ba liketso tsena,
ekasitana le ho hlahisa lintlha litabeng tse ntseng li etsahala metseng ea bo bona, kaha ho ba beha tsietsing ea ho hlaseloa ke linokoane tse ntseng li baka lipolao tsena tse soto.
Monghali Mofokeng o hlalositse hore sebakeng seo ho bolaeanoa ‘nyene le bosiu, bophelo ba motho ba bo nkile joaloka ba monoang feela tjena, ‘me taba ena e ntse e ja setsi kaha babolai ba ja monakalali oa kebolela.
A re bao e bang ba ka oela liatleng tsa sepolesa, ha ba fihla makhotleng ba lokolloa ka beili.
Ho feta moo, Mokhethoa oa Lebatooa la Khafung Monghali Chopho Lekholoane, o hlalositse hore litaba tse etsahalang ka hare ho lebatooa leo a le sebeletsang oa li tseba.
O itse ba kile ba etsa pitso ka tsona kaha ehlile li ba tšoentse, empa o itse pitsong ena o bona ho sena batho ba bangata joaloka pitsong e fetileng, ‘me o nahana hore sesosa ka taba ea hore sechaba se bontšitse hore sea tšaba.
Monghali Lekholoane o thoholelitse Mookameli oa Sepolesa ha etetse motseng ona oa habo bona ho tla thusa ho rarolla bothata bo teng ba lipolaeano.
O boletse hore ho na le bafu ba babeli ba ntseng ba e so bolokoe, ‘me o kopa hore lipolaeano li fele kaha ba batla khotso.