Kamor’a tokiso ea kotopo ea tsela e eang Matelile, Ha Sehlabo lipula tse matla li boetse li sentse tsela ea Matelile.
Puisanong le Lentsoe La Basotho, Mokh’anselara oa ‘Maliepetsane Monghali Mating Maieane o bontšitse hore tsela ena ha se lekhetlo la pele e eba le bothata,’me e ile ea lokisoa kaha ho ne ho bonahala e hoholeha mobu o lebopong la qetello ea tsela.
Monghali Maieane o re ho ile ha ahoa mabota a tlang ho thibela metsi a likhohola ho hohola mobu oo, empa ho bonahala ha likotopo tse kentsoeng moo li hloloa ke boima ba metsi a mangata kaha ke moo a lihetse le oona mabota ao.
“Ho bonahala likotopo tse sebelisitsoeng tseleng ena li sitoa ho jara metsi a mangata e be a phunyelletsa hohle a baka likhohola tsena tsa ho liha le mabopo,” a rialo.
Haa tsoelapele o re e se e ka ‘muso o ka potlakela boemo boo pele tsela eo e aroha ka lehare, kaha ho qepha hoa mabota ao a ahiloeng ho ntse ho ata hoo tsela eo e leng haufi le ho aroha ka lehare.
Lebitsong la baqhobi ba makoloi a baeti ba Matelile le Ribaneng, Monghali Thapelo Maseru o bontšitse ha ba se ba le tsietsing ea hore na tsela eo ha e na baka kotsi, kaha lehlakore le leng la eona le se le sa tsamaehe hohang, ‘me letsoalo ke hore tsela eo e tla senyeha kaofela ebe hae sa tsamaeha kaofela.
“Takatso ea rona ke hore ha borokho ba Tsoaing bo qetoa eka mokonteraka a ka fetisetsoa ka nqa ena e le ho potlakela ho thiba kotsi pele e eba teng,” a toboketsa joana.
Monghali Maseru o re ha tsela ena e ka senyeha ho feta moo ho tlil’o ba khutlisetsa morao moo ne ba sebelisa tsela ea Thaba-Tšoeu, eo le eona e seng e se boemong ba ho sebelisoa ka sekhahla kaha ebile e thella ha pula e nele.
Puisanong le Lentsoe La Basotho, ea buelelletseng sechaba sa Matelile Mofumahali ‘Malerato Sehlabo o bontšitse ha taba-tabelo ea bona e le sechaba e le hore ‘muso oa Lesotho o ba thuse ka hore ho qaloe likotopo tseo qalong e le hore ba fumane leseli la sesosa sa hore na hobaneng e senyeha le ha e qeta ho lokisoa.
Mofumahali Sehlabo o re tsela eo e jarile likhoebo tsa Basotho tsa kamohelo ea baeti tse fumanehang sebakeng seo, ‘me ha ho ka ba le tlhokahalo ea tsela eo e tlil’o ema pele ho sebetsa ha tsona hobane li sebetsa ka ho ba le baeti ho hlaha libakeng ka ho fapana.
“Re ka thaba haholo ha re ka bona tsela eo e lokisitsoe hobane le bana ba rona ba kena likolo ka nqa tsa Ha Makhakhe le Motsekuoa, re lula re le tsietsing hobane ha re tsebe nako eo ho tla ritsa ka eona moo,” a tokoboketsa joana.
Ha phethela, Mofumahali Sehlabo o ipilelitse ho ‘muso ho utloa sello sa bona ka ho aha bocha likotopo tseo, kaha ho bonahala hore mabota a ntseng a ahoa ha tlise phethoho ea letho ha e le moo tsela e senyeha le pele selemo se fela e lokisitsoe.