Sechaba sa HaNthonyana lebatooeng la ‘Maliepetsana le seboko ka tlhokahalo ea litsela le motlakase.
Sena se bakoa ke tsela e ntseng e khephoha le ho senyeha ho ea pele le motlakase o sieo.
Puisanong le Lentsoe la Basotho, Mokhʼanselara oa Ha Nthonyana, Mofumahali ‘Matatolo Rotang, o bontšitse ha tlhokahalo ea motlakase le tsela li amme sechaba haholo hobane kamehla ha ho epiloe lipitso ba lla ka tsona.
Mofumahali Rotang o re sechaba se tobane le sehlabelo se seholo kaha litšebeletso li lieha ho fihla ho bona ka lebaka la tsela e senyehileng.
A re ha bakuli ba le teng motseng phalo e ema le lesemela ha ba lokela ho isoa lipetlele hobane likoloi li tsamaea ha bohloko. “Mokuli o ee a fihle sepetlele maemo a se a hlobaetsa haholo,” a hlalosa joalo.
Ha a thetha litaba tsa hae, a hlalosa hore motse o kene ka har`a lefifi la bonkantjana ka lebaka la ho hloka motlakase.
A re o na le tumelo le tšepo ea hore ha motlakase o kaba teng le botlokotsebe bo tla ea moriting, kahoo a ipiletsa ho ‘muso hore ruri o ke o shebe sechaba sena ka leihlo la mohau.
E mong oa baahi ba HaNthonyana, Mofumahali Motšelisi Nomo, o hlalosa ha bophelo ba ho hloka motlakase le tsela e le bophelo bo imelang baahi, hobane ke bothata le ho phahamisa matla a mehala ea bona ea thekeng ha letsatsi le le sieo kaha ba sebelisa motlakase oa letsatsi.
Mofumahali Nomo a re o hopola ka hloko ha bana ba sekolo ba ne ba sitoa ho ea likolong ka lebaka la marokho hobane a khaohile, ‘me mathata a hloa manolo holimo ha pula e nele hore na bana ba tla tšela noka joang. A re seo se etsa bana ba lofe sekolo makhetlo ka lebaka la marokho a khaohileng.
Qetellong ea litaba tsa hae, Mofumahali Nomo o re o se a bile a tšaba ho palama koloi ha a ea toropong hobane tsela e mpe, ‘me tšabo ea hae ke hore koloi e tla phethoha ka eena. A re bophelo ba bona bo tsietsing ka lebaka la tsela e ntseng e khephoha ho ea pele.
E mong oa banna ba motse, Monghali Mofana Khesa o re takatso ea bona e le sechaba ke hore ba be le motlakase, hobane ke ka makhetlo a mangata motseng oa bona ho thoe maqheku a chelletse ka tlung ka lebaka la kerese, ‘me o re o tšepa hore ha motlakase o le teng taba eo e tla ea moriting hobane ha ba bonesa ba tla tobetsa leboteng feela.
Ha a tsoelapele ka litaba tsa hae, o re motlakase ke tlhokahalo e kholo haholo hobane setsi sa bona sa bophelo Sebelekoane se sebelisa motlakase oa letsatsi, kahoo o re ha pula e na kapa maru a thibile ho ne ho tlisa tšitiso e kholo haholo setsing se jereng bophelo ba bona.
Ha a fera litaba tsa hae, o ipilelitse ho ‘muso hore o ke o thuse sechaba ka tsela le motlakase hoba ke tsona sello sa bona sa mantlha.