Ka sepheo sa ho batalatsa mabala molemong oa phetiso e ntle ea litaba, Morafo oa litaemane oa Letšeng o phurile leshoetla le baphatlalatsi ba litaba ka Labohlano Maseru.
Morafo o bontšitse ha ho bonahala litaba tsa oona li sitoa ho fetela sechabeng ka tsela e nepahetseng, ‘me o bone ho hlokeha hore o be le maqhama le bophatlalatsi hore mosebetsi o tsebe ho etsahala ka thello.
Ho ea ka mookameli oa Letšeng , Monghali Matooane Thinyane o hlalositse ha morafo oa habo esale o thehoa ka 2004 ho e-na le likatleho tse ‘maloa tseo ba li fihletseng.
A re pele ho selemo sa 2004 morafo o ne o sebetsa ka ho sebelisa Basotho ho cheka taemane ka peke le kharafu, empa kamorao ho moo ho ile hoa e ba le mekhoa e mecha ea ho sebetsa joaloka ho sebelisa mechini e meholo ho rafa.
Ho feta mona, a re Letšeng e kenya letsoho haholo ho thusa sechaba sohle sa Basotho le baahi ba Mokhotlong moo morafo ona o leng hona teng, joaloka ho hira bana ba Basotho ba nang le litsebo ka litaba tsa merafo, esita le ba senang litsebo.
A re kaha ba ka se atlehe ho hira batho bohle ba leka ho thusa ba bang ba sechaba ho ba etsetsa likhoebo molemong oa hore ba tsebe ho iphelisa, a supa hore likhoebo tseo li kenyeletsa leruo la bo-`malitšibana, esita le likhomo tsa lebese.
“Re bile le moo re etsang tokiso ea litsela haholo tse tsamaelang Mokhotlong, ho bona hore sechaba se tsamaea se bolokehile e le ho qoba likotsi tsa litseleng,” a supa joana.
O boetse a supa hore morafo o kenya letsoho ho fa bana ba Basotho lihlapiso tsa ho ea likolong tse phahameng, haholo lithutong tse sebetsanang le litaba tsa merafo.
Ho sa le joalo Raliphatlalatso oa morafo oa Letšeng, Monghali Tšepo Hlojeng o supile hore morafo oa Letšeng Basotho ba una molemo haholo ho oona, kaha morafo o le kahar’a naha ea bona.
A tea mohlala hore hangata e le morafo ba kenyang letsoho litabeng tsa bophelo ka ho thusa batho ba amehang likotsing tsa likoloi ha ba le tseleng e eang Mokhotlong haufi le morafo, e le ho ba isa setsing sa bona sa kokelo kapa ho ba isa lipetleleng tsohle kahar`a naha moo e bang bona ba sa atlahe ho fana ka thuso e joalo.
A re morafo oa Letšeng ka motseteli oa oona Gem Diamonds o na le karolo ea 70% moo ‘muso oa Lesotho le Basotho ba nang le karolo ea 30% ea morafo, ‘me ba etsa ka hohle hore chelete eo ba lokelang ho e fa ‘muso ho etsa mosebetsi oa Basotho ba lule ba e lefa mafelo a selemo le selemo.
Monghali Hlojeng, a bontša hore morafo ona ha o hlahise litaemane ka bongata, empa litaemane tseo ba li hlahisang ke tsa boemo bo holimo haholo, ‘me li rekisa haholo ‘marakeng, moo Lesotho le hlahang boemong ba borobeli lefatše ka bophara ka tlhahiso ea litaemane, ha thekisong le hlaha boemong ba pele Afrika.
Ka lehlakoreng le leng, mophatlalatsi ea bileng le seabo ‘mokeng ona Monghali Thabo Moloi o supile hore o motlotlo haholo hore e be morafo oa Letšeng o tšoere ’moka ona, kaha ka nako e ’ngoe baphatlalatsi ba bonahala ba sa tsebe letho ka litšebeletso tse etsoang ke morafo baneng ba Basotho le ho Sechaba ka kakaretso.
A re ba na le tumelo e kholo e le baphatlalatsi hore ba se ba tla sebetsa hantle le ho fana ka litaba tsa ’nete ka morafo oona sechabeng, e le ho qoba ho etsa sechaba se ferekaneng se sa tsebeng litaba.