Monna ea lilemo li 35, Theko Ntaote, oa Ha Makotoko Metolong, o hlahile ha khutsoanyane kapele ho Lekhotla la ‘Maseterata Maseru ka Labohlano, a qosoa ka ho bolaea `Mathabiso Tlali.
Lekhotla le bontšitse hore ka la 19 `Mesa 2024 `melaelloa o ile a thatela mofu molomong a mo setisa ho hema, a mo tlama maoto le matsoho ho fihlela a nehela moea.
Ke moo lekhotla kamor’a ho mo balla qoso ea polao le ileng la mo hlalosetsa litokelo tsa hae hore o na le tokelo ea ho batla `muelli oa khetho ea hae, empa h`a sena chelete a ka kopa `muelli oa `muso moo a tlang ho lefa M250.
Lekhotla le boetse la mo hlalosetsa hore o na le tokelo ea ho kopa ho lokolloa ka beile Lekhotleng le Phahameng kaha ke lona le nang le matla a ho mamela kopo e joalo.
Ntaote o emetse nyeoe a le ntloana-tšoana, ‘me o tla boela a hlaha hape lekhotleng ka la 11 Phuptjane 2024, moo a tlang ho tseba hore na lipatlisiso tsa nyeoe li ha kae.
Ho sa le joalo, banna ba babeli ba Ha Ramorakane ba ahlotsoe selemo ntloana-tšoana ka mor’a ho fumanoa ba le molato oa ho rekisa mothamahane ntle le litokomane tse ba lumellang.
Banna bana ke Kajeng Kotele ea lilemo li 23 le Tiisetso Mokokoane ea lilemo li 35.
Lengolo la qoso le supa ha ka la 03 `Mesa 2024, banna bana ba ile ba fumanoa ba ntse ba rekisa mothamahane hona Ha Ramorakane.
Ba ile ba ipolela ba le molato, `me ba kopa lekhotla ho ba ahlola ka mohau, ba ile ba hlalosetsa lekhotla hore ha ba sebetse, kahona ba leka ho iphelisa.
Lekhotla le ba ahlotse selemo kapa ho lefa M1000 moqosuoa ka mong, `me ba ile ba atleha ho e lefa.
Ho sa le joalo, banna ba robeli ba hlahile lekhotleng le tšoanang ba qosoa ka bosholu ba boqhobane le ho otla.
Babelalloa bana ke Lefu Jeke ea lilemo li 26, oa Ngope-Tšoeu, Lefa Lesoma (32) oa Ha Monyooe, Limpho Pheko (30) oa Setleketseng, Moeketsi Tšeole (34) oa Ha Khechane, Tieho Qhala (30) oa Koung Ha Chere, Taelo Matsatsi (39) oa Setleketseng, Thabo Halafu (32) oa Ha Sematle le Motlatsi Machache (34) oa St Rodrigue.
Banna bana ba qosoa ka hore ka la 28 `Mesa 2024, tseleng ea Ha Lebamang ba ile ba thibella koloi e neng e tsamaea ka Phakiso Makhetha, Tumelo `Mei le Mahlomola Tsiame.
Ba boetse ba qosoa ka hore ba ile ba khakhatha boraro bona ka melamu, ba ikhapela chelete e kaalo ka M2000 le mehala ea thekeng.
Ba ile ba fuoa ka beile ea M2000 moqosuoa ka mong, `me ba ile ba atleha ho e lefa.