Barutoana ba likolo tsa mathomo tsa Maseru LECSA le Maseru East ba amohetse limpho ho tsoa ho bahlophisi ba menyakoe ea boithabiso, hammoho le mokhatlo oa Tsoseletso Foundation bekeng e fetileng.
E mong oa bafani, Monghali Motlatsi Makhetha o re kamor’a ho hlokomela bohloki ho karolo e ‘ngoe ea bana likolong tsena tse peli ba ile ba ikeletsa ho nanabetsa letsoho ka thepa eo.
“Joalokaha le ‘na ke se ntse ke le khutsana ke thusoa, ke ile ka fumana ho le bohlokoa hore letsatsi lena e be mokete oa likhutsana o tlang ho khutlisetsa ho bona le hore likhoebo tse nang le khahleho li kenye letsoho,” a toboketsa joana.
Monghali Makhetha o bontšitse hore ba etsa sena hobane ba ile ba qholotsoa ke maemo a seaparo sa sekolo ao ba ee ba bone bana ba bangata metseng ba shebahalang ka teng.
Mokhethoa oa Stadium Area 32, Mofumahali ‘Mampho Tjabane o bontšitse hore o motlotlo haholo ho bona bacha ba kenya letsoho tlhokomelong ea thuto e sireletsehileng ea bana ba Basotho.
O bontšitse hore boithuto ba ngoana bo matlafetseng bo tsoaloa ke ho apara seaparo se amohelehang le ho fumana lisebelisoa tse lokelang, kaha bana ba na le tokelo ea ho phela ka bohloeki le ho robala ba jele kamehla.
Mofumahali Tjabane o tobokelitse hore ke mohopolo o motle ho bona hore tšebeletso tsa mofuta ona li anela lebatooa la Stadium Area, kaha ba ile ba fana le ka litulo.
A tšepisa hore ba tla etsa bonnete ba hore Setsi sa Pokello ea libuka se fumana libuka, e le hore bana ba atlehe ho bala ntle le tšitiso ea letho.
“Khopolo ke hore mokhatlo ona oa Tsoseletso o tla anetsa letsoho likolong tsohle tsa Lebatooa ho fihlela bana ba le boemong bo tšoanang, ho se ea ikutloang a tšaba ho ea sekolong hobane a haelloa ke tlhoko ea sekolo,” a rialo.
Lebitsong la matichere, Mofumahali ‘Malerato Sefefo o supile hore ke tlotla ho bona hore sechaba se ela hloko litlhoko tsa barutoana ba tsietsing le ho atlehisa boleng ba thuto ea bona.
Mofumahali Sefefo o re ha mofani a elelletsoe hore ho na le tlhoko ho ngoana oa sekolo ea lieta le hore na o ja joang le bohloeki ba ngoanana, seo ke sesupo sa hore tsotello e teng.
“Ho se ho le boima hore le rona re ka tlatsetsa hoba bana ba tlokotsing ba bangata, kaha malapa a se a kolla ntsi hanong ka lebaka la mesebetsi e sieo le theko e nyolohileng ea lisebelisoa ka kakaretso,” a li beha joana
Ha tsoelapele, o khothalelitse bafani ho se felle moo, kaha bana ba hlokang ba le bangata haholo likolong ka ho fapana kahare ho teropo ea Maseru le kantle ho eona.
Har’a tse fanoeng ke lieta tsa sekolo tse 20 sekolong ka seng, libuka, lijo le lisebelisoa tsa bohloeki.