Litho tse tharo tsa lelapa le le leng li ile tsa thunngoa tsa ba tsa timela Mokhotlong tikolohong ea Khubelu, Khonofaneng.
Sena se boletsoe ke Motlatsi oa Raliphatlalatso tsa sepolesa Inspector `Mareabetsoe Mofoka ka Labobeli litlalehong tsa sepolesa tsa beke le beke, moo a supileng hore litaba tsena li etsahetse ka la 8 Phuptjane lipakeng tsa hora ea botšelela le ea borobeli.
O itse tlaleho e hlalosa ha litho tseo li ne li le kopanong ea lelapa moo e mong oa tsona a ileng a tsoela kantle, eaba ke moo a ileng a fafatsoa ka lethala la likulo a ba a timela hang.
Inspector Mofoka a tsoelapele ho hlalosa hore litho tse ling tse neng li le ka tlung li ileng tsa qobelloa ka moo ka tlung ka lethala la likulo.
O itse ke moshanyana ea lilemo li robong, mosali ea lilemo li 43 le monna ea lilemo li 56 ba ileng ba timela hang tlhaselong ena. A re monna ea lilemo li 30 eena o ile a hlokahala tseleng e ea sepetlele Tšepong.
Athe monna ea lilemo li 46 eo e leng Mookameli oa mahokela a sebaka seo, eena o tlalehoa a ntse a le kokelong sepetlele.
Inspector Mofoka a tsoelapele ho hlalosa hore ho bile le moshanyana ea lilemo li kaholimo ho 20 ‘moho le nkhono ea lilemo li 78 ba phonyohileng ba se na likotsi. A supa hore moshanyana eo ea phonyohileng ke mora oa monna ea ntseng a okoa sepetlele. A qetella ka ho hlalosa hore likhaketlana tsa likulo tse fumanoeng moo ke tsa sethunya sa moetso oa 9MM.
Haho motho ea ts`oeroeng mabapi le ketsahalo ena, kahona Sepolesa se thakhotse lipatlisiso.
Leribe
Seloantoa Letsoaka oa Leribe Ha Khabo o ahloletsoe ho hoehla lilemo tse 15 chankaneng a sa itefelle ke lekhotla la setereke seo.
Tlaleho e hlalosa ha monna eo a qositsoe ka khoebisano ka batho, kaha ka Hlakola 2024 a ile a etsa molaetsa marang-rang moo a neng a hlalosa ha a batla motho ea tla sala le ngoana, `me motho ea joalo o tla lefshoa M1,500.
Ke moo mosali ea lilemo li 21 oa Koro-Koro Maseru a ileng a buisa eo monga molaetsa hona marang-rang moo, a bontša thahasello ea mosebetsi o joalo. Bobeli bo tlalehoa bo ile ba lumellana ka ho kopana, `me lehlatsipa la ea Leribe moo le neng le ilo kopana le mong’a mosebetsi.
Inspector Mofoka a re tlaleho e hlalosa ha ba fetse ba kopane, `me ba tsamaea `moho ho ea ha monna eo. Ke moo itseng ha ba theohela ka lengopeng le leng monna eo a ileng a beta mosali eo.
A re ha a qeta ba tsoetsepele ka leeto la bona ho ea ha bo monna eo, ‘me ho fihleng ha bona ba ile ba kena ka moo monna a lulang, eo a fetola mosali eo lekhoba la thobalano.
Inspector Mofoka o re letsatsing la boraro lehlatsipa le ile la tsoela kantle, la bona monna lapeng moo ea ba lea mo tlalehela. Monna eo o ile a tlalehela sechaba se ileng sa tlalehela sesole sa motebo oa Ha Khabo, se ileng sa lata monna eo, `me sa nehelana ka eena ho sepolesa.
Há tsoelapele a re monna eo o ne a lula le ngoanabo ea lilemo li ka bang 14 ka tlung ka moo a neng a fetotse mosali eo oa Koro-Koro lekhoba la thobalano.
Butha-Buthe
Seeiso Letsie 33 oa Ha Tšosane o tšoeroe Butha-Buthe ka bosholu ba boqhobane ba chelete e M165,000. Tlaleho e bontša ha ka la 7 Motšeanong hoseng eena le e mong ba ile ba bonoa ke molebeli oa e `ngoe ea likhoebo hona moo.
Molebeli eo o ne a jere mokotla, `me banna bao ba tla ba mo setse morao. Ke moo e mong a ileng a mo feta, a thinya ea ba o mo nyanyatsa ka mosi o fahlang mahlong ha Seeiso eena a ile a hula sethunya sa eo molebeli, ea ba ba phamola mokotla ba nt’o ipha limenyane ka koloi ea nomoro ea K 415 BBF.
Tlaleho e supa ha koloi e joalo e ile ea bonoa, `me ha tšoaroa Letsie kaha e ne e le eena ea neng a ntse a e qhoba ka la 4 Phuptjane, ‘me a hlaha lekhotleng la `Maseterata Leribe ka la 6 khoeling e holimo.
O ile a fuoa beile ea M2,000 le ho beha paneng M10,000 tseo a atlehileng ho li lefa. Monna ea neng a e-na le eena o ntse a iphile limenyane, `me Letsie o hlalositse ha sethunya se le ho eo ea iphileng limenyane.
Inspector Mofoka o itse tlaleho e hlalosa ha chelete e sa fumanoa kaha Letsie a hlalositse hore ha ba qeta ho nka chelete eo ba ile ba mema metsoalle ea bona, `me ba leba Afrika Boroa moo ba ileng ba inyakalatsa ka eona ho fihlela e fela.