Kamorá ho kena seahlolong sa temo ea poone, ‘muso le sesole ba khola litholoana tse molemo
Ke hona moo Tona-kholo a ileng a etella pele kotulo ea mariha Ha Foso ka Labohlano.
Ha bua kotulong ena, Monghali Ntsokoane Matekane o bontšitse hore o motlotlo ho bona hore temo ena e atlehile ho sa natsoe maemo a ileng a rena likhoeling tsa ho feta moo lijalo li ileng tsa ameha haholo.
Monghali Matekane a re temo ke phunyeletso eo naha e tlang ho hlola tlala le bofuma ka eona, ha sechaba sa Lesotho se ithokhubetsa ho eona ka matla le ka boikopanyo.
“Ke khothetse haholo ke ho bona chai ena, ‘me sena se pakahatsa hore re ka qalella ho lokisa mobu oa rona molemong oa temo ea lehlabula kaha ebile mongobo o le mongata ka lebaka la lehloa”, a toboketsa joana.
A tsoelapele ka hore ‘muso o itokiselitse ho thusa sechaba ka mechini ea oona e le ho nanabetsa letsoho katlehisong ea temo kahare ho naha.
Mookameli oa sesole, Lieutenant General Mojalefa Letsoela a re sesole sa Lesotho se ile sa ikeletsa ho nka karolo tlas’a leano le leholo la ‘muso oa kanetso ea lijo.
A bontša hore morero oa bona ke hore lijo tseo ha li tloha masimong li lebisoa sechabeng ho nanabetsa letsoho ho malapa a tlokotsing e le ho fenya tlala ka se senyanyene seo ba se kotutseng.
“Re ne re tšoenyehile haholo ha re bona lijalo li otloa ke komello empa ke mona karolo ea rona e ile ea atleha ho se angoe ke komello e joalo, ‘me kajeno lena re kotula poone e matlafetseng e boleng boo neng re bo lebeletse”, a rialo.
Lt. General Letsoela a re ka theko le tšireletso ea naha, e meng ea mesebetsi ea Sesole sa Lesotho ke ho itlhahisetsa lijo ho bona hore ba iphepe.
Letona la Temo, Kanetso ea Lijo le Phepo e nepahetseng, Monghali Thabo Mofosi o khothalelitse sechaba ho qalella ho kenya mohoma temeng kaha kotulo ea poone ena ea seahlolo sa ‘muso le sesole e le bopaki ba hore Molimo o atlehisa ba jalang ka meokho ho kotula ka litlatse.
Monghali Mofosi o hlalositse hore khothaletso ea hae e ntse e le hore sechaba sa Basotho se se fele pelo ha Tona-kholo a ile a ba tšepisa ho nanabetsa letsoho kaha a fela a phethahatsa ka moo a tšepisitseng ka teng.
“Tona-kholo o etsa bonnete ba ho sala morao tšebetso ea matona a hae, ‘me seo se susumetsa letona ka leng ho bona hore litšepiso tsa Tona-kholo li’a phethahala kahoo ha re se mo tšoareng ka pelo re eeng masimong”, a li beha joana.
O tsoetse pele hore taba ea phetoho ea boemo ba leholimo e se eme pele temo kaha e le temong feela moo e reng ha motho a ile a lahleheloa ka makhetlo e tlang hore nako eo chai e khutlang eba e buseletsa tahlehelo eo e imenahantse.
Ha phethela, Monghali Mofosi a re sechaba se se nyahamisoe ke liqholotso tsa komello hobane ke temong moo ekareng ha motho a sebelisitse M500 a ka fumanang e fetang moo kamor’a kotulo.