Lipapali tsa basali tsa ho phunyeletsa ho bapala liking e kholo tsa leboea li tla tsoelapele mafelong a beke lebaleng la Bambatha Maseru.
Kamor’a lipuisano tse telele lipapali tsa basali tsa ho phunyeletsa ho bapala liking e kholo ka leboea li e-na le morearea, qeto e fihletsoeng ke Mokhatlo o tsamaisang Bolo ea Maoto (LeFA), ke hore papali li phetoe ka la 22 ho isa 23 Phuptjane selemong se holimo.
Sena se tla kamor’a hore sehlopha sa Stoko se bapalise sebapali se sa lokelang ho bapala kaha litokomane tsa sebapali li na le mathata.
Ho ea ka phatlalatso e entsoeng ke LeFA, lipapali tsa basali ka leboea tsa ho phunyeletsa ho bapala liking e kholo tse bapetseng ka khoeli ea Motšeanong, li tla phetoa kaha ho bile le litaba tse ngata tse sa khotsofatsang lihlopha.
Ho sa le joalo, Komiti e alositseng bolo ea basali kahare ho naha pejana e ntšitse polelo moo e hlalositseng hore sehlopha sa Koalepe ke bona bompoli ba lipapali tsa ho phunyeletsa liking e kholo ka leboea.
Seo se ile sa boholoa ke lintja kaha sehlopha sa Stoko se ile sa ngola lengolo leo ka lona se ne se tletleba ka liqeto tse nkiloeng ke komiti tsa ho khetha sehlopha sa Koalepe e le bompoli empa ba ne ba tseba e le bona bompoli.
Lebitsong la sehlopha sa Stoko Fc, Mookameli oa sehlopha Mofumahali Lieketseng Mokati o hlalositse hore qeto e fihletsoeng ke komiti ha e’a ba thabisa empa ba lokela ho hahamalla pele ba itlhophele ho bapala lipapali tsena.
Mofumahali Mokati a tsoelapele hore boitlhopho ke bo matla sehlopheng le libapali li se ntse li le boikoetlisong moo ba tla itlhophela ho qothisana lehlokoa le lihlopha tseo ba pannoeng le tsona.
“Ha ho patang hore komiti e entse qeto tsa eona ha pejana re ne re tseba e le rona bompoli empa kamor’a lipuisano litaba li ile tsa fetoha ra nkeloa lintlha hamorao ha thoe sehlopha sa Koalepe ke bompoli, empa qeto ena e fihletsoeng rea e thabela ‘me re malala-a-laotsoe ho bapala,” o rialo Mofumahali Mokati.
Ho feta mona, liki e kholo ea basali e felile bompoli ba sehla e le sehlopha sa LDF Ladies ka lintlha tse 54 ha lihlopha tse rathiloeng ke selepe e le sehlopha sa Rovers le sehlopha sa Mawes.
Sehlopha sa Bokamoso ke sona se phunyelelitsang ho kena liking e kholo ho hlaha ka boroa ha ka lehlakoreng la leboea lihlopha ke hona li tla qothisana lehlokoa ho loanela ho phunyeletsa.
Moqebelo
LMPS VS Ramblers
Manamela vs Koalepe
FC Stoko vs LMPS
Ramblers vs Manamela
FC Stoko vs Koalepe
Sontaha
LMPS vs Koalepe
Ramblers vs FC Stoko
Manamela vs LMPS
Koalepe vs Ramblers
FC Stoko vs Manamela